今日決戰忠義街, 我九點半上車, 係山區行一陣, 之後駕車出九龍塘, 十點幾到九龍塘, 師傅叫我下車, 佢行一次決戰路線給我看, 忠義街有兩條路線, 路線A係長線, 路線B係短線, 路線A我比較熟悉, 因為學車人士可以駛入, 但有一部份路線B係學車人士不准駛入, 所以我對路線B比較陌生.
車頭前有兩罐寶礦力, 師傅話考車前飲有用, 可以提神, 師傅叫我飲, 佢話之前有個學生考車前唔飲, 到考車時, 係路口無睇清楚就出車, 比考牌主任一腳踏停, 結果肥佬. 我聽後好自然拿起一罐寶礦力飲了三份二.
師傅行完兩條路線, 駛回試場, 我入試場中心報到. 之後我上番車等考牌主任. 經歷兩次考牌唔及格, 我今次決戰成功的信心其實唔高(最有信心係第二次, 可惜係關鍵時刻發夢….), 係等待途中, 我將剩餘三份一的寶礦力飲完, 考牌主任亦上車, 今次個考牌主任戴黑超, 幸好我對他說早晨, 佢都有回應(其實想同佢講句Bonjour, 唔知佢會有咩反應…). 佢check完我張身份証和學習駕駛執照後, 叫我開車, 我發現佢無配戴安全帶, 我好有禮貌叫佢戴安全帶. 做完一輪扮野動作後(check中鏡, 拉實安全帶…etc.), 我望鏡, 望盲點, 打燈出車, 一出車已經要落斜, 我用二波落斜都好似行得好快, 係第一個路口停車, 望清楚路口無車才出車(平日早上11點, 條路唔係好多車), 心裡覺得第一個路口都ok, 之後一段平路, 上三波, 之後要收慢, 望中鏡, 望盲點, 打燈轉線, 之後落斜用二波, 好快到達班馬線前, 我離遠見到有個阿婆企係班馬線前, 我係班馬線前停車讓阿婆過, 但係阿婆仍然企係度, 仲揮手叫我過, 我再望清楚無人過班馬線就繼續行, 我見到考牌主任用手攬住張分紙, 我無理佢, 然後到達T字路口, 要轉右. 這個路口都好順利(望右望左再望右, 竟然無車..連遠處巴士站都無巴士….), 我出路口期間見到考牌主任望左邊, 幸好都係無車, 之後一段微微上斜路, 前面都係無車, 都幾順, 然後聽到考牌主任話前面路口轉右, 我回應佢一句”知道”後, 心裡即刻沉, 前面路口轉右即係考路線B, 我之前行都無行過, 係斜路三波轉二波, 到達路口仍然係綠燈, 我見對面線有私家車衝緊落, 我駛入路口轉右個箭袋位然後停車. 望清楚對面線無車(好鬼驚, 因為要斜路開車, 幸好無溜後, 車亦無cjock), 然後轉右入直路.
轉入直路後, 已經見到前面有死車, 我想打燈過死車, 但望對面線有對頭車行緊, 對面線亦有死車, 我最後選擇停車, 等對面線無車行, 我打燈抽頭過死車, 過死車過程都順利, 好快到達路口, 條路都無乜車, 過路口後, 到達之前條班馬線, 條班馬線一個人都無, 連之前個阿婆都唔見左, 我慢駛過完班馬線, 到達T字路口, 今次要轉左, 轉左過程都係無車, 之後一條上斜直路, 前面死車都無, 好快駛番試場.
番到試場, 做完一連串停車動作後, 同考牌主任講”唔該 sir”, 等考牌主任落車後, 我落車. 今次落車的心情比上兩次落車的心情複雜. 第一次考完落車, 好似發左場夢. 第二次考左三份一都知自己唔合格, 所以落車好輕鬆, 今次整個考試過程都幾順利, 起碼無比考牌主任一腳踏停, 我覺得順利但唔知個考牌主任點諗……
我入試場中心等成績, 等了一陣, 試場主任叫我名…….我望分紙……決戰成功(及格).
最後多謝師傅, 學車過程都好輕鬆, 師傅講笑話真係好笑, 令我學車無乜壓力. 今次決戰成功, 終於可以有車牌, 但應該唔會咁快買車. 今次個車牌算係自己一年一目標的結果, 上年係大學畢業, 今年係車牌, 下年唔知會是什麼呢….
